Առաջին անգամ Հայաստանում հրատարակվել է «Սոցիալական աշխատանքը քրեական արդարադատության համակարգում» ձեռնարկը
25/10/2013
Հոկտեմբերի 24-ին Միջազգային իրավական համագործակցության գերմանական հիմնադրամի աջակցությամբ և ֆինանսավորմամբ, ՀՀ ԱՆ «Իրավախախտում կատարած անչափահասների հատուկ ստեղծագործական կենտրոն», «ՀՀ ԱՆ իրավաբանական ինստիտուտ» ՊՈԱԿ-ների հետ նախաձեռնությամբ տեղի է ունեցել «Սոցիալական աշխատանքը քրեական արդարադատության համակարգում» ձեռնարկի շնորհանդեսը:
Միջոցառման ընթացքում մասնակիցներն անդրադարձել են նաև արդարադատության համակարգում առկա սոցիալական աշխատանքի վիճակին ու զարգացման հեռանկարներին՝ Հայաստանի Հանրապետությունում պատիժների կատարման համակարգի բարեփոխումների համատեքստում:
Միջոցառմանը ներկա IRZ (Միջազգային իրավական համագործակցության գերմանական հիմնադրամ) Հարավային Կովկասի բաժնի ղեկավար Թերեզա Թալհամերը խոսել է իրականացված ծրագրի, կազմակերպության աջակցությամբ առաջին անգամ Հայաստանում հրատարակված ձեռնարկի մասին, որի նպատակն է աջակցել պատիժների կատարման համակարգում ընթացող բարեփոխումներին:
ՀՀ արդարադատության նախարարի խորհրդական Նիկոլայ Առուստամյանը ներկայացրել է բարեփոխման բաղադրիչները` առկա իրավական ակտերի նախագծերը և կարևորել մասնագիտական գրականության առկայությունը համակարգի մասնագետների վերապատրաստման գործում: Միաժամանակ նա ներկայացրել է որոշ մանրամասներ «Իրավախախտում կատարած անչափահասների հատուկ ստեղծագործական կենտրոն» ՊՈԱԿ-ի գործունեության, զարգացման ընթացքի և նոր ծրագրերի մասին:
