Տիգրան Խաչիկյանի մասնակցությամբ կայացել է հակակոռուպցիոն ռազմավարության նախագծի շուրջ հանրային քննարկում

07/06/2019

Արդարադատության նախարարությունում այսօր նախարարի տեղակալ Տիգրան Խաչիկյանի և մի շարք հասարակական կազմակերպությունների ներկայացուցիչների մասնակցությամբ կայացել է հակակոռուպցիոն ռազմավարության և դրանից բխող գործողությունների ծրագրի նախագծի շուրջ հանրային քննարկում:

Աշխատանքային քննարկման ընթացքում փոխնախարար Խաչիկյանը մասնակիցներին ներկայացրել է հակակոռուպցիոն ինստիտուցիոնալ մոդելի ընտրության շուրջ առկա դիրքորոշումը՝ տեղեկացնելով, որ նախկինում հասարակական հատվածի կողմից կատարված առաջարկների գերակշիռ մասը ներառվել է նախագծում, ինչի հիման վրա լրամշակված նախագիծն առաջիկայում կներկայացվի հանրային լայն քննարկման՝ հնարավորություն ընձեռելով առավել կատարելագործել ներկայացվող նախագիծը:

Հակակոռուպցիոն ինստիտուցիոնալ համակարգի ձևավորման համատեքստում փոխնախարարը կարևորել է կոռուպցիայի կանխարգելման հանձնաժողովի դերակատարման բարձրացման անհրաժեշտությունը և ներկայացրել կոռուպցիոն հանցագործությունների քննության մեկ միասնական մարմնի ու հակակոռուպցիոն մասնագիտացված դատարանի ստեղծման նախատեսումը:

Հանդիպման ընթացքում անդրադարձ է կատարվել նաև ձևավորվելիք հակակոռուպցիոն մարմնի անկախության երաշխիքներին, ապօրինի ծագում ունեցող գույքի վերադարձման օրենսդրական մեխանիզմներին և մի շարք այլ հարցերի:

Այնուհետև, հաջորդել է հարց ու պատասխանը մասնակիցների միջև: