Արդարադատության նախարարի այցը՝ Շիրակի մարզ

30/05/2016

 Հայաստանի Հանրապետության արդարադատության նախարար Արփինե Հովհաննիսյանը մայիսի 27-ին աշխատանքային այցով Շիրակի մարզում էր:

 Նախարարի առաջին կանգառը Շիրակի մարզպետարանն էր, որտեղ մարզպետ Հովսեփ Սիմոնյանի հետ առանձնազրույցի ընթացքում քննարկել է մարզի բնակիչներին հուզող և արդարադատության նախարարության գործառույթներին առնչվող մի շարք հարցեր:

 Մարզպետարանում քաղաքացիների ընդունելության ժամանակ ևս Արփինե Հովհաննիսյանին ներկայացվել են մի շարք խնդիրներ, որոնց լուծման վերաբերյալ նախարարը հանձնարարականներ է տվել նախարարության աշխատակիցներին:

 Նախարարը, մարզային այցի շրջանակում,  եղել է Շիրակի մարզի ընդհանուր իրավասության դատարանում, մարզկենտրոնի նոտարական գրասենյակում, Այլընտրանքային պատիժների կատարման բաժնում, Պետական ռեգիստրի գործակալության և ԴԱՀԿ ծառայության գրասենյակում, տեղում ծանոթացել հանրային ծառայություններ մատուցող բաժինների խնդիրներին:

 Արփինե Հովհաննիսյանը եղել է նաև Շիրակի պանթեոնում, ծաղիկներ դրել ապրիլի սկզբին Ադրբեջանի սանձազերծած մարտական գործողությունների հետևանքով զոհված հայորդիների շիրիմներին, ինչպես նաև այցելել նրանց ընտանիքներ։